LALAKE MIINGON UG “HAPPY CONDOLENCE” UG NANUMBAG, GITIGBAS
Gitigbas sa suspetsado ang lalake nga mihunghong ug “Happy Condolence” ngadto sa iyang live-in partner, ug nanumbag kaniya sa agtang didto sa Sitio Can-uyan, Brgy. 1, Poblacion, Dapa, Surigao del Norte niadtong Martes, Hunyo 16 sa may alas 5:30 sa kahapunon.
Naila ang biktima nga mao si EUGENE SUMANDO ESPAÑOLA, 36 anyos, minyo, driver ug lumulupyo sa Brgy. Bitoon, Del Carmen, Surigao del Norte samtang ang suspetsado naila nga mao si JAMES RARUGAL SANICO, 29 anyos, aduna’y katibo, mag-uuma ug lumulupyo sa Sitio Can-uyan, Brgy. 1, Poblacion, Dapa.
Nasayran sa imbestigasyon nga miadto ang maong suspetsado sa videoke house ni Dominggo Santinas aron sa pagsundo sa iyang live-in partner nga mao si Aida Santinas, diin ang biktima ug ang mga paryente niini ang nag-inom.
Sumala pa, miduol ang biktima sa katibo sa suspetsado ug mihunghong kini ug “Happy condolence” nga gibadlong sa iyang mga paryente. Miduol kini sa suspetsado ug sa wala’y igong rason iya kining gisumbag sa agtang hinungdan sa naangkon nga injury sa suspetsado nga gibadlong pag-usab sa mga paryente ang maong biktima.
Gumikan sa mga panghitabo, migawas ang suspetsado ug mikuha ug “boyo” mga 20 pulgadas ang gitas-on ug gitigbas ang biktima tulo (3) ka higayon nga naigo sa tuo ug wala nga kamot, ug daling gidala sa Siargao District Hospital sa Dapa samtang ang suspetsado ang boluntaryong mitahan sa Dapa Municipal Police Station. (Jun Prex Salubre, Ronda 6 RPN DXKS)
