Cebu City-Dugang Malasakit Center ang gitakdang buksan sa upat ka provincial hospital sa Cebu karong umaabot nga mga adlaw.
Ang maong mga tambalanan nahimutang sa siyudad sa Bogo, Carcar ug Danao ug lungsod sa Balamban.
Segun sa news release nga gipagawas sa Provincial Information Office (PIO), si Sen. Christopher Lawrence ‘Bong’ Go mipadayag og suporta sa request ni Gob. Gwendolyn Garcia pag-establisar sa Malasakit Center sa mga ospital nga gipadagan sa Kapitolyo.
Ang nahisgotang sentro ang modumala sa help desk sa mga ahensiya sa gobyerno nga mohatag og hinabang sa kabos nga mga pasyente sama sa Philippine Health Insurance Corp. (PhilHealth), Philippine Charity Sweepstakes Office (PCSO) ug Department of Social Welfare and Development (DSWD).
Ang pagbukas sa Malasakit Center nagpasabot usab sa pag-download sa pundo sa Office of the President agig bangkilya sa ayuda nga ihatag sa naasoyng mga ahensiya sa kagamhanan ug pagtapak sa kuwang nga bayranan sa gitabangan nga pasyente.
Niadtong Biyernes, Marso 6, gipangulohan ni Sen. Go ang paglusad sa tulo ka Malasakit Center sa tulo ka tambalanan sa Metro Cebu – ang Talisay City District Hospital, St. Anthony Mother & Child Hospital sa Cebu City ug Lapulapu City Hospital.