Cebu City – Gimandoan sa Regional Trial Court (RTC) sa Syudad sa Sugbo ang Department of Social Welfare and Development (DSWD-7) pag release gikan sa ilang kustodiya sa usa ka 16-anyos nga lumad nga tinun-an, kansang amahan midangop sa korte pinaagi sa pag petition alang sa writ of habeas corpus.
Si RTC Branch 20 Presiding Judge Leah Geraldez mi grant sa petition ni Lope Haictin ug gimandoan si DSWD-7 Director Rebecca Geamala ug Brenda Abilo, staff sa DSWD-7 Crisis Intervention Center alang sa dinaliang pag release sa minor nga si Meka ngadto sa iyang amahan.
“In view of the foregoing, the Court finds that there is no factual and legal basis for the confinement of *** at the DSWD VII Crisis Intervention Center,” unod sa ruling ni Geraldez.
Si Meka usa sa 22 ka lumad nga tinun-an nga nalakip sa gi claim sa otoridad nga rescue operation gikan sa bakwit school nga mipasilong sa University of San Carlos sa Barangay Talamban, Syudad sa Sugbo.
Gitumbok sa kapolisan nga ang bakwit school gi gamit sa New People’s Army pag indoctrinate ug pag recruit ug bag-ong mga membro.
Ang amahan sa tinun-an mihingalan ni Geamala, Abilo ug Police Regional Director Brigadier General Montejo nga mga respondents sa iyang petition.
Matod sa petitioner nga ang mga nahisgutang respondents mipugong kaniya (petitioner) nga maka kita sa iyang anak sukad sa iyang pag-abot sa Syudad sa Sugbo niadtong Pebrero 24.
Gihimakak ni Lope ang pangangkon sa kapolisan nga ang mga lumad nga kabataan, lakip sa iyang anak, gidala sa Syudad sa Sugbo nga way pagtugot sa mga ginikanan.
Iyang gibutyag nga niadtong Oktubre 2019, nananghid ang iyang anak nga mo-apil sa bakwit school sa Sugbo human ang Community Technical College sa Southern Mindanao gipasirad-an sa kagamhanan.
(Jhon Tadlip/JTY)
(News & photo courtesy of Regional Trial Court- Branch 20 | Save our Schools Network Cebu)