Cebu City – Mitugot na si Cebu City Mayor Edgardo Labella nga makasud sa siyudad ang mga PUJ sa Mandaue ug Talisay City.
Nahinabi sa media, si Labella miingon nga nadawat na niya ang rekomendasyon sa Jeepney Task Force (JTF) nga misugot sa pagsud sa mga dyip sa Mandaue ug Talisay City.
Suma pa ni Labella, mosugot sila nga makasud ang maong mga PUJ sa siyudad basta motuman sa minimum health protocols ug sa guidelines sa LTFRB.
Gipasabot sa mayor nga usa kini ka paagi aron pagtabang sa mga trabahante sa dakbayan nga nagpuyo sa silingang mga siyudad nga madali pagbiyahe paingon sa ilang gitrabahoan.
Matod pa ni Labella, girekomendar sa JTF ang pagpasaka sa gidaghanon sa mga dyip nga magsudlanan sa siyudad subay sa protocols sa LTFRB sanglit ilang namatikdan nga daghang kawani ang namalik na pagtrabaho sa ilang opisina sa Cebu City.
Subay niini, nanghinaot ang mayor nga makapalambo kini sa dis-og sa ekonomiya diin ang mga walay trabaho madasig sa pagpangaplay tungod kay aduna na may sayon nga kasakyan sa biyahe sa tulo ka siyudad.
Gitakdang moisyo og Executive Order (EO) si Labella alang niini ugma ug ang  implementation posibleng sa Lunes na. (Jhon Tadlip/JTY)
(Source: Cebu City Public Information Office, photo courtesy by Ritsu Watanabe)