Iriga City — Matrayumpong ginibo kasu-odma an Simultaneous Earthquake Drill ngunian na inot na quarter kan 2021 sa man lain-lain na banwaan sa Rinconada Area kun sain pinartisiparan kan man iba ibang sector an nasabing preparedness program na pinagmamando kan NDDRRC asin kan OCD.
Sa cuidad nin Iriga pinaginutan mismo kan CDRRMO, PNP, BFP, City Health Office asin Civil Security Unit (CSU) na ginibo sa Everest Plaza sa may Brgy. San Jose.
Sa banwaan nin Baao, nagin partisipante an mga estudyantes kan LCC asin mga empliyados kan local na gobierno an nagin parte sa okasyon.
Sa banwaan man nin Buhi, tiniripon man ni Mayor Margie Aguinillo an mga empliyados kan munisipyo tanganing gibohon an aktibidad, kapareho kan ginibo sa banwaan kan Nabua asin Bato sa pamamayo kan saindang mga alcalde Fernando Simbulan asin Frank Bernaldez.
Katuyuhan kan nasabing aktibidad na pakusugon an magkakanigong preparasyon sa pag-atubang sa posibling linog na mangyayari, pinakusog pa man kaini an pagtatabangan kan man lain-lain na ahensya tanganing makua an tamang solusyon sa pag-atubang sa trahedya. (Melvin F. Barayoga, RPN DZKI OIC)
(Source: LGU Iriga, photo courtesy of Iriga City Facebook page)