Cebu CITY- Gimandoan sa labaw sa kapolisan sa rehiyon 7, Brig. Gen. Albert Ignatius Ferro, ang pagpaimbestigar ang Konsehal Niña Mabatid tungod sa pag-post sa social media og walay klarong impormasyon labot sa coronavirus disease kun Covid 19.
Atol sa press briefing gahapon sa buntag, si Ferro miingon nga hugot nilang gimonitor ang mga tawong magbutang-butang og estorya labot sa virus nga makamugna hinuon og kakuyaw o katarantar sa ubang tawo.
Segun sa post ni Mabatid, tulo ka tawo sa Cebu ang namatay sa Covid 19 pero wala kini kompirmaha sa Department of Health kun DOH-7 nga nagpasabot nga fake news kini busa kinahanglang maimbestigar.
Matod ni Ferro, ilang pangayoan og katin-awan si Mabatid nganong gi-post niya ang maong impormasyon sa social mediabisag wala pay klaro.
Sumala pa ni Ferro, isip opisyal sa siyudad angay unta nga dili magpataka pag-post ang konsehal og balita labot sa Covid 19 aron walay makuyawan.
Sa iyang bahin, si Col. Hector Grijaldo Jr., director sa CCPO, miingon nga ilang ipatawag si Mabatid aron sukit-sukiton sa maong butang.
Sa iyang bahin, si Mabatid namahayag sa media nga ang iyang post walay tuyo sa paghatag og kahadlok sa publiko.
Matod niya, iya kining gi-post aron pagdasig sa katawhan nga magpabilin sa balay ug motuman sa executive order sa mayor.