Cebu City- Gikonsiderar nga PUM kun persons under monitoring ug gipaubos sa home quarantine sud sa hapit na duha sa semana ang tanang 478 ka delegado sa Central Visayas sa National Schools Press Conference kun NSPC ug National Festival of Talents kun NFOT sa Department of Education kun DepEd.
Sumala pa sa tigpamaba sa DepEd 7, Amaryllis Villarmia, nag-self quarantine sila sukad sa ilang pag-abot sa tagsatagsa nila sa probinsiya.
Ang mga delegado gilangkoban sa mga tinun-an, magtutudlo ug coaches.
Mikabat sa 108 ka tawo ang nagrepresentar sa Central Visayas sa NFOT nga gipahigayon sa Ilagan City, Isabela samtang 370 sa NSPC sa Tuguegarao City, Cagayan Valley.
Ang kalihokan sa NSPC ug NFOT gihimo gikan sa Marso 9 ngadto sa Marso 13.
Ang NSPC ug NFOT mao ray mga kalihokan nga gipadayon sa DepEd taliwa sa hulga sa COVID-19.
Matod ni Villarmia, gipailawom sila sa home quarantine tungod sa executive orders nga giluwatan sa lainlaing LGU’s ug tungod usab sa nagsaka nga ihap sa mga kaso sa Covid 19 sa nasod.
Ang NFOT events naglakip sa Technolympics for Technical-Vocational-Livelihood Education; Information and Communications Technology (ICT) and Entrepreneurship; Sining Tanghalan; Nationwide Song Writing and Choral Group; National Pambansang Tagisan ng Talento sa Filipino; ug Special Program in the Foreign Language sama sa Spanish, Mandarin, Japanese, French, Arabic, Braille ug sign languages.