Tungod sa padayong pagtaas sa kaso sa CoVid-19 ning panahona, hugot nga gimandoan ni Gobernador Bambi Emano ang tanang Misamis Oriental Department Heads Association (MODHA) nga ipatuman sa hingpit ang pag-implementar sa pagsunod sa insaktong gabayan ngadto sa tanang buhatan nga gilangkoban sa tanang empleyado sa Kapitolyo Probinsyal.
Walay undang sa pag-awhag ang Gobernador nga dili kalimtan sa tanan nga isip mga kawani sa gobyerno dunay responsibilidad nga mahimong ehemplo sa uban sama sa maoy manguna sa pagsunod o pagtuman sa balaod.
Gumikan sab nga adunay natalang nagpositibo sa kaso sulod mismo sa Kapitolyo samot nga nangisog ang kagamhanan nga dili angay mapasagdan kini hilabina hisgutanan na ang risgo sa kinabuhi sa tanang katawhan.
“Og dili ta maningkamot ani labina kamo mga ulo sa departamento dinhi sa kapitolyo nga mura og wala nay CoVid nga kung tan-awon nato ang kaso gataas. At the end of the day, many of us already doing what we can even the PHO together with the offices like PDRRM and PSWD. This time let us allow the rule sa atong balaod, sa Civil Service, sa EO nato. Magsugod ta show cause order. I will create already a Committee for all those who are not following,” sulti ni Gobernador Bambi.
Sa makausa pa mihangyo si Gobernador Bambi nga dili niya gusto dunay makalapas sa balaod apan og duna man, andam siya kauban ang mga ulo sa departamento nga mopahamtang sa hustong silot o konsekwensya.
“For the ‘nth and for the last time, we call on the attention of all MODHA. Walay personalan. When we violated the rules especially sa CoVid, that’s also the end of our friendship kung dili man gani ta kabalo mosubay ug motuman sa balaod. I cannot sacrifice the entire province for a couple, for a few. Especially we’re paid by the taxes of the people,” dugang pahayag ni Gobernador Bambi.
Walay laing tumong si Gobernador Bambi kondili ang mabutang sa kasing-kasing ug huna-huna sa tanang empleyado nga lakip sa paghatod sa tiunay nga serbisyo mao ang makanunayong pagsunod sa mga balaod gumikan isip public servants nga maoy unang motubag sa panginahanglan sa katawhan gikinahanglan usab nga mahimong modelo sa pakigbatok niining giatubang nga pandemya.
(Provincial Information Office – MisOr)