Davao City – Gipasalig sa tropa sa Eastern Mindanao Command Philippine Army dinhi sa rehiyon nga suportado nila ang nahimong kamandoan sa ilang commander in chief na si Pangulong Rodrigo Duterte nga kinahanglan non-partisan ang kasundalohan sa ipahigayon nga midterm election sa mosunod nga tuig.
Matud pa sa Eastmincom dihang gibisita sa Tri- Media Organization for Peace and Alliance Incorporated kun TROPA Inc., pabilin sila nga non-partisan organization ug motamud sa konstitusyon nga pinaagi sa paghimo sa ilang mandato ug pagprotekta sa katawhan ingon man pagpanalipud sa nasud.
Gawasnon sab sumala pa ang katawhan sa ilang mga katungod ilabi na ang pagpili sa buot nila nga mga kandidato.
Isip kabahin sa komunidad, naglaom ang Eastmincom nga unta mahimo sa mga mapili nga kandidato ang mga proyekto sa programa ug proyekto sa kagamhanan alang sa kaayohan ug kalamboan sa katawhang Pilipino ingon man ipadayon ang pagbatok sa illegal nga droga, korapsiyon, insurhensiya ug terorismo.
Samtang sa pikas bahin, Gitino sa Commission on Elections (Comelec) 11 nga wala pa silay listahan sa ginatawag nga mga election hot spots sa Davao region. Apan gibutyag ni Atty. Krisna Samanta Caballero, tigpamaba sa Comelec Region 11 nga subli pa gihapon nila nga tun-an ang mga lugar nga kalakip sa ilang listahan sa milabay nga Barangay Election kaniadtong bulan sa Mayo.
Ayha sumala pa ang ipahigayon nga pinili-ay sa mosunod nga tuig, makigtigom una sila sa kasundalohan ug kapulisan aron nga isapinal ang mga lugar nga sagad init ang panag-atbang sa mga politiko.
Samtang gitataw sab ni Atty. Caballero nga andam na sila sa ipahigayon nga pagduso sa mga kandidato ug certificate of candidacy karong adlaw nga huwebes.
Wala sab sumala pay kabag-ohan sa ilang mga pangayuon nga mga rekisitos gawas lamang sa gamiton nga forms nga mamahimong ma-download gikan sa ilang website.