Mukabat sa kapin P7 milyones nga balor sa smuggled nga sigarilyo ang nasakmit sa mga personahe sa kapulisan sa gipahigayong opersayon, didto sa Purok Orchids, Brgy. Sinaman, ning dakbyan sa Dipolog, Hunyo 7, 2024.
Nasayran nga nakadawat ug impormasyon ang mga personahe sa kapulisan, kalabot sa presensya sa gituohang walay dokumento nga smuggled nga sigarilyo sa nasangpit nga lugar, hinungdan nga mibuhat ug Joint Intel Driven Operation kauban ang RID9 pinangulohan ni PMSg. Ronald C. Wapelle, RA Team Zamboanga del Norte ubos sa pagdumala ni PCOL BONIFACIO B. ARAÑAS JR. Hepe sa RID9, RA Team Zamboanga del Norte, uban sa Dipolog CPS pinangulohan ni PLTCOL EDWIN D VERZON-COP, Dipolog CPS uban sa Intel Operatives and Duty Investigator, PIU, ZNPPO ug 1st ZNPMFC personnel.
Ang operasyon miresulta sa pagkasikop ni CHARLIE ZAMORAS SARIAS, 42 anyos, lalaki minyo, ug residente sa Purok Orchids, Sinaman, Dipolog City ug nasakmit ang 138 ka mga kaso/kahon sa mga undocumented ug gidudahang smuggled nga sigarilyo nga gibuak sama sa mosunod: 60 case sa DUNSTON, 35 case sa HERO, 32 case sa TWO MOON, 6 case sa BERLIN ug 5 case sa WINSTON nga adunay gibanabana nga market value nga P 7,907,400.00 ug adunay Standard Price nga P57,300.00 matag master case.
Ang mga nakumpiska nga gidudahang walay dokumento nga smuggled nga sigarilyo gidala ngadto sa Dipolog CPS alang sa dokumentasyon ug pagpasaka sa tukmang kaso. (Medalyn U. Borja)
(Source: Dipolog CPS)