Cebu City- Miabot na karon sa Sugbo ang kapin sa 200 ka OFWs o overseas Filipino workers, nga sagad seafarers nga natanggong sa Metro Manila.
Segun sa impormasyon nga gihatag sa Philippine Coast Guard o PCG 7, gipatuman ang gitawag og ‘mercy voyage’ para pagpapauli sa mga seamen sa ilang tagsatagsa ka lugar human matanggong sa kaulohan tungod sa ECQ o enhanced community quarantine.
Mikabat sa 328 ka OFWs ang sakay sa pasaheroang barko sa 2Go nga MV St. Michael Archangel ug gitakdang modunggo sa Kabisay-an ug Mindanao.
Sa maong gidaghanon, 267 ang mokawas sa Pier 6 sa Cebu City pasado alas tres ganinang kaadlawon ug sa maong gidaghanon, 47 ang para Bohol.
Sumala pa sa PCG 7, kadtong paingon sa Bohol ihatod dayon sa Pier 1 diin nagpaabot ang laing barko nga modala kanila sa Bohol.
Gikan sa pantalan sa Sugbo, molahos ang barko sa 2Go ngadto sa Dumaguete, Ozamiz, Iligan, ug Zamboanga City aron pagdiskarga sa dugang pasahero.
Giingong migikan ang barko sa Manila alas 10 gahapon sa buntag.
