Cagayan de Oro City – Sugod karong adlawa sa pagpatuman sa multa nga tag dos mil pesos niadtong wa magsul-ob sa face mask ug face shield, kapin usa ka gatos ang nasapon niini nga nakalapas sa maong balaodnon dinhi sa syudad. Ang maong lakang gipatuman tungod kay namatkadan nga daghang mga tawo ang wala mahadlok sa COVID-19. Matud pa ni Oliver Egypto, ang hepe sa Office of Community Affairs, angay kahadlukan sa katawhan ang Covid-19 inay nga ang penalty.
Sa report sa City Hall’s Disiplina Muna Advocacy Team, kalagmitan sa mga nasapon naa sa Cogon Market, ang usa ka pinakadakong merkado publiko ning syudad. Ang pagpahamtang sa multa batok niadtong malapason pagsul-ob sa face mask, face shield ug pagtuman sa social distancing gibase kini sa Ordinansa No. 13946-2020.
Tungod sa maong kahimtang, gitinguha karon sa City Hall ang pagmobilize sa 5,000 ka mga kawani niini apil na sa mga volunteers stakeholders diha sa ilang kampanya batok Covid-19. (City Information Office)