Gikan sa magbantay, karon siya na ang gibantayan human nadakpan sa gipahigayon nga buy-bust operation sa Barangay Santo Niño, Talibon, Bohol. Ang operasyon gipangulohan sa Talibon Municipal Police Station (MPS) ubos ni PMAJ Romar Tuppal Labasbas sa nakalabay na adlaw.
Ang nadakpan mao ang usa ka 27-anyos nga lalaki, kanhi security guard sa Cebu City Hall. Nakuha gikan kaniya ang lima (5) ka pakete sa gituohang shabu nga may gibug-aton nga 1.50 gramos ug gibanabana nga nagkantidad og P10,200. Apil sa narekober ang buy-bust money nga P500 ug usa ka kaha sa sigarilyo nga gigamit sa pagtago sa droga.
Sa pagkakaron, ang suspek anaa sa kustodiya sa Talibon MPS ug mag-atubang og mga kasong may kalabotan sa Section 5 ug Section 11 sa Article II sa Republic Act 9165, o ang Comprehensive Dangerous Drugs Act of 2002. (Renante Socia Lada)