Cebu City– Mitaliwan na ang kanhi mayor sa Cordova, Cebu ug Presidential Legislative Liaison Office (PLLO) Secretary Adelino “Addie” Sitoy sa edad nga 85.
Mao kini gipahibawo ni Lapu-Lapu City Mayor Junard “Ahong” Chan sa iyang post sa Facebook.
Giangkon ni Chan nga gikahinabi pa gani niya si Sitoy bahin sa plano niini sa Lapu-Lapu dihang iyang nadawat ang balita sa kamatayon sa kanhi mayor.
Nagkanayon si Chan nga lisod dawaton ang nahitabo diin piho nga nagbangotan karon ang iyang pamilya, mga kahigalaan, mga kauban sa buhat sa Malacañang, mga Cordobanhon nga dugay niyang gialagaran ug mga Oponganon nga nagsunod sa iyang maayong binuhatan.
Si Sitoy namatay gumikan sa cardiac arrest.
Gawas sa pagka mayor, naka silbi usab siyang bise mayor sa Cordova gikan sa 2007 ngadto sa 2016 sa wa pa itudlo ni Pres. Rodrigo Duterte isip PLLO Head.
Pagka 1975 ngadto sa 1984, nahimo siyang sakop sa hunta probinsiyal ug nahimo nga assemblyman gikan sa 1984 ngadto sa 1986. (Jhon Tadlip/JTY)
(Source: Junard Chan, photo courtesy of PLLO Website | House of Representatives-18th Congress)
