Gidakop sa mga sakop sa Cebu City Police Office si kanhi Cebu City administrator Atty. Colin Rosell, nahitabo kini kagahapon sa hapon, Nobiyembre 8, 2024, didto sulod mismo sa Mayor’s Office.
Mismo ang Director sa Cebu City Police Office (CCPO), nga si Police Col. Antonietto Cañete ang nipusas niini sa kalapsan sa usurpation of authority.
Mahinomduman nga nipugos gyud pagsulod sa Cebu CIty Hall si Atty. Rossell ug tungod niini si Cebu City Legal Officer Santiago Ortiz Jr. niduso usab ug report ngadto sa Waterfront Police Station human sa maong insidente sa pasangil nga niisyu kini ug memorandum bisan kung dili na siya ang city administrator.
Nagdumili unta sa pagkuyog sa kapulisan si Atty ROsell apan napusasan ug nadala gyud kini sa Police Station 3 sa CCPO.
Atol sa press conference, si Rosell niingon nga ang ilang kampo mopasaka og mga reklamo sa paglapas sa Anti-Graft and Corrupt Practices Act batok kang Mayor Raymond Alvin Garcia, City Administrator Kristine Joyce Batucan, ug DILG 7 Director Leocadio Trovela.
Ang kampo ni Rama nagpabilin sa ilang baruganan nga preventive suspension lang ang mayor sulod sa unom ka buwan ug wala gitaktak sa serbisyo, niinsistir nga wala siya nakadawat og kopya sa kamanduan sa Office of the Ombudsman nga nagtangtang kaniya sa katungdanan ug nagpahamtang og perpetual disqualification sa paghupot sa publiko nga opisina.
Lima ka buwan human gisuspenso sa Ombudsman si Rama, si Rosell, iyang asawa, kinsa nangulo sa Office of the City Assessor, Maria Theresa Rosell, ug laing lima ka personnel sa City Assessor’s Office sulod sa unom ka buwan tungod sa giingong kapakyas paghatag sa upat ka mga empleyado sa City Hall sa ilang sweldo , laing kamandoan sa Ombudsman ang giluwatan niadtong Oktubre 3, nga nagpamatuod nga sad-an si Rama sa grave misconduct ug nepotism tungod sa pagkuha sa iyang duha ka mga bayaw sa City Hall, ug gipahamtangan siya og silot nga dismissal sa katungdanan ug perpetual disqualification alang sa paghupot sa umaabot nga katungdanan sa publiko.
Si Garcia, kinsa diha sa iyang buhatan sa legislative building samtang si Rosell nagpahigayon og press conference sa executive building, nitug-an sa media nga gisunod lang niya ang lagda sa balaod, nga giila sa DILG 7, sa iyang paglingkod isip mayor sa siyudad niadtong Oktubre 9, 2024.
Sa pagkakaron nihimo na usab og legal nga mga lakang ang kampo si suspended Mayor Michael Rama. (Renante Socia Lada)