Sa tanang hingamit apan dili himayad sa kuryente sa tibuok Zamboanga del Norte, wala nay makalupig pa sa kagamhanang probinsiyal nga adunay balayrunon sa kuryente nga moabot sa tulo hangtud upat ka bulan ug mokabat na sa ₱ 7.2 million.
Human gitagaan ang kagamahanang probinsiyal sa “last and final demand” niadtong Setyembre 10, ang Zamboanga del Norte Electric Cooperative (ZANECO) miputol na sa supply sa kuryente sa pito ka mga metro nga gipanag-iyahan sa probinsiya niadtong Setyembre 21.
Ang mga gipangputlan mao ang mosunod:
Provincial Library – ₱ 147,481.11
Zamboanga del Norte Tissue Laboratory – ₱ 209,618.62
Zamboanga del Norte Provincial Government – ₱ 3,293,470.97
Zamboanga del Norte Engineering Office – ₱ 337,772.73
Provincial Nursery – ₱ 29,966.81
Biological Control Laboratory – ₱ 23,274.50
Provincial Agriculture – ₱ 14,013.24
Ang duha ka mga ospital, Sergio Osmena Sr. Hospital – ₱ 27,978.91 ug Zamboanga del Norte Medical Center – ₱ 3,145,125.29, ang wala giapil sa gipangputlan tungod sa “humanitarian reasons.”
Ang kinatibuk-ang balayrunon sa kagamhanang probinsiyal miabot na sa ₱ 7,228,701.68.
Hinuon, gibalik ra sab ang kuryente sa nahisgutang mga buhatan sa probinsiya pagka-hapon nianang adlawa human mi-interbener si Project Supervisor Sherwin Manada, kinsa maoy gikatahong migarantiya nga mapaninglan ang kagamhanang probinsiyal sa mga obligasyon niini ngadto sa ZANECO.
Si Manada gibutang sa National Electrification Administration kun NEA ngadto sa ZANECO isip “overseer” taliwala karon sa panagbangi sa management sa maong kooperatiba batok sa lima ka mga overstaying nga mga directors sa Board.
Ang mga overstaying directors mao silang Board President Uhlan Calasang, Board Secretary Adrian Deo Dalman ug Directors Danelito Castro, Eduardo Castor ug Andrewlito Orilloza.
Matud sa mga tinubdan sulod sa kapitolyo, gitawagan ni Governor Roberto Uy si Manada aron hangyuon nga ibalik lang ang kuryente sa nahisgutang mga buhatan sa probinsiya.
Hinuon, ang mga nagdumala sa ZANECO namahayag nga kun dili gihapon makabayad ang kagamhanang probinsiyal karong bulan sa Oktubre, putlan na sab sa ZANECO ang mga nahisgutang mga buhatan gawas sa mga ospital.
Matud ni ZANECO General Manager Adelmo P. Laput, ang pagdumili sa probinsiya pagbayad sa obligasyon niini sa ZANECO ang nahasupak sa mga gibuhiang pamahayag ni NEA Administrator Edgardo Masongsong nga kinahanglang mobayad gyud ang mogamit sa kuryente ilabi na ang mga government units. (ZANECO/Press Release)