Maituloy iti maikadua a lawas ti bulan ti Marso ti Kadiwa Market on Wheels.
Imbatad ni Mrs. Elma Gabriel, mangidadaulo ti MSE Office ti gobierno probinsial a gapu iti kalikagum ni Gob. Matthew Marcos Manotoc nga ad-adu nga umili ti mabenipisiaran ket dua nga ili ti pakaisayangkatan ti nasao nga aktibidad iti kada lawas.
Mainaig iti daytoy, inbunannagna a dagiti nakasagana a pagturungan ti Kadiwa iti masungad a lawas ket ti ili nga Adams ken ti ili a Pasuquin.
Nupay kasta, kunana nga iti agdama ket maiyur-uray paylaeng ti decision da Mayor Rosalia Dupagen ti Adams ken ni Mayor Ferdinand Aguinaldo ti Pasuquin no ana nga aldaw ken sadino ti pakaisayangkatan ti nasao nga aktibidad.
Maipalagip nga impabus-oy ti gobierno kadagiti mayor a mangngeddeng kadagitoy a banag gapu ta mamati a dagitoy ti ad-adda a makaammo no kasano ti kaadu kadagiti kalugaran ti mabalin a manggundaway iti nasao a programa probinsia.
Innayon ni Gabriel a palno a maileppas amin nga ili iti amianan a paset ti probinsia sakbay nga agturong ti Kadiwa iti dumaya. (Rodrigo Sadian, RPN DZRL Batac OIC)
(Source: Provincial Government of Ilocos Norte)