CAGAYAN DE ORO CITY- Gimando ni Bukidnon Governor Jose Ma. Zubiri ang pagkanselar sa nailing Kaamulan Festival sa Malaybalay City tungod sa kabalaka sa 2019 coronavirus nga mihapak sa atong nasud. Usa ka memorandum ang gipagula ni Zubiri nga nag-awhag sa tanang mayors, mga barangay officials ug lumad leaders sa pagpahunong sa preparasyon sa Kaamulan, Festival nga, gitakdang himuon sa March 23-Abril 23 ning tuig.
Ang kamanduan sa gobernador gihimo tapos usab sa gipagulang memo sa Department of Health pinaagi ni Secretary Francisco Duque nga nag-awhag sa publiko sa dili pagtambong sa mga concerts ug uban pang panangtigom sa publiko gumikan sa hulga sa coronavirus. Matud pa sa DOH, aduna pay lima ka pasyente ang gimonitor karon sukad niadtong Pebrero 12, 2020.
Ang Kaamulan Festival mao lamang ang ethnic cultural event sa nasud nga gisalmutan sa pito ka mga dagkong grupo sa mga lumads sa Bukidnon. Kalagmitan molungtad kini sa usa ka bulan nga magfeature sa lumad games, dances, street dances, ug rodeo sa mga homegrown cowboys nga nakapaagni sa libo-libo na nga mga turista sa nanglabay’ng katuigan.
