Nagsanib puwersa na ang Johnson & Johnson, Moderna Inc., at ang gobyerno ng Estados Unidos para makabuo ng bakuna laban sa coronavirus disease 2019 (COVID-19).
Sa ngayon, ilang bansa na ang puspusang bumubuo ng anti-COVID-19 vaccine dahil sa patuloy na pagkalat ng virus sa iba’t-ibang panig ng mundo.
Batay sa mga ulat, inaasahang sa 2021 pa mailalabas ang bakuna laban sa COVID-19 dahil kinakailangan pa nitong isailalim sa mga pagsusuri upang mapatunayang epektibo ito at walang masamang epektong idudulat sa mga tao.
Sa anunsiyong inilabas ng J&J, sinabi nito na nasa $1-bilyon ang halaga ng nilagdaan nilang kasunduan sa U.S. government para mapabilis ang pagbuo ng vaccine.
Inaasahang sa Setyembre ng taong ito umpisahan ng J&J ang kanilang testing ng nasabing bakuna.
