Kinumpirmar kan Albay Veterinary Office (AVO) na may iba pang barangay sa provincia an saindang pigbabantay na posibleng apektado naman kan African Swine Fever (ASF).
Marurumduman na nagkapirang barangay sa banwaan kan Tiwi an tinamaan nin ASF kun saen ginatos na mga orig an isinairarom sa depopulation ngani masiertonna dai na ini maglakop asin makaabot sa mga pagtaraid na barangay.
Segun ki Provincial Veterinarian Dr. Pancho Mella, may mga report ng nakaabot sa saindang oficina kun saen padagos an saindang pigsasagibong balidasyon mantang an iba, pighahalat na sana an resulta kan mga isinagining eksaminasyon sa mga pigtutubudan na tinamaan nin ASF.
Katakod kaini, padagos an mahigot na pagbabantay kan saindang mga pag-iriba kasabay an mga tauhan kan lokal na gobyerno sa mga border control ngani na malikayan an paglakop pa kan nasabing helang.
Sa ngonyan, solamenteng an banwaan kan Tiwi an nasa red zone (infected zone) na nangangahulugan na igwa nin nairehistrong kumpirmadong kaso nin ASF sa lugar.
(Source: Albay Provincial Information Office)