Igwa nang directiva an Camarines Sur PNP Provincial Office sa gabos na mga jefe de pulisya kan Municipal Police Station na magwarak nin kapupulisan sa mga simbahan lalo na sa gigibohon na ‘misa de aguinaldo’ poon sa Deciembre 16 hasta 24 asin sa pagsabat kan Bagong Taon.
An kasuguan na ini nganing maseguro an paz y orden sa mga actividades sa simbahan ngunian na panahon nin pasko, sabi ni P/Major Maria Victoria Abalaing, opisyal na parataram kan PNP Provincial Office kan CamSur.
An misa de aguinaldo saro sa mga debosyon kan catolico romano antes kan Pasko kaya ngani an mga simbahan haros pano nin mga parasimba.
Sinabi pa na kaipuhan an dugang na mga awtoridad bako lang sa mga simbahan envez sa mga establisimiento de negosyo, Pantalan, aeropuerto, mercado, terminal asin sa iba pang mga matatawong lugar. Saro ini sa dahilan na an saindang higher command nag-orden na prohibido ngona an pagbakasyon kan mga kapupulisan.
Mientrastanto, pinatanidan man an mga mapasaway na mapaputok nin rebentador sa oras kan mga misa. Igwa mga pinagbabawal na mga makukusog na rebentador an dai tutugotan kan PNP, huli kaini sa mga tiendahan pa sana saindang i-momonitor kaibahan an miembros kan Bureau of Fire Protection. (JV Navarro Verdeflor Jr., photo credits to the owner)