Matagumpay na nailagay ang 12 marker at buoy sa loob ng itinakdang Fish Sanctuary at Marine Reserve sa bayan ng Tigaon, Camarines Sur noong Hulyo 3 at 4, 2025.
Pinangunahan ng Fisheries Management Regulatory and Enforcement Division (FMRED) ng BFAR Bicol ang aktibidad katuwang ang lokal na pamahalaan ng Tigaon, at sa pakikipag-ugnayan sa Department of Environment and Natural Resources (DENR), Philippine Army, at Philippine Coast Guard. Nagsimula ito ng alas-7 ng umaga at tumagal ng dalawang araw upang matiyak ang maayos at tamang paglalagay ng mga palatandaan sa paligid ng protektadong karagatan.
Matapos ang deployment, nagbigay ang BFAR5-FMRED ng teknikal na gabay sa Tanggapan ng Municipal Agriculturist. Inirekomenda ang agarang pagsasagawa ng Information, Education, and Communication (IEC) campaign sa mga baybaying barangay upang mapalakas ang kaalaman ng komunidad ukol sa kahalagahan ng marine protected area. Hinikayat din ang LGU na i-activate at palakasin ang kanilang Bantay Dagat upang regular na magpatrolya at bantayan ang lugar laban sa mga ilegal na gawain.
* Ang Fish Sanctuary ay isang bahagi ng karagatan na idineklara bilang protektadong lugar kung saan ipinagbabawal ang pangingisda at iba pang aktibidad upang mapanatili at maparami ang mga yamang-dagat. Mahalaga ito upang mabigyan ng pagkakataong dumami ang mga isda, mapanatili ang balanse ng ekosistemang dagat, at masiguro ang tuloy-tuloy na kabuhayan ng mga mangingisda sa hinaharap. Sa pamamagitan ng tamang pangangalaga at suporta ng komunidad, ang mga marine sanctuary ay nagsisilbing tahanan ng mga isda at iba pang lamang-dagat.
Source: BFAR Bicol