Bago pa man ang opisyal na pagbubukas ng Palarong Bicol 2026, nagsagawa ng sama-samang pagtatanim ng puno ang mga opisyal, kawani, at stakeholders bilang simbolikong pagsisimula ng pamana ng taunang palaro.
Pinangunahan ang aktibidad ng mga opisyal ng Kagawaran ng Edukasyon sa Rehiyon 5, sa pangunguna ni Regional Director Gilbert T. Sadsad at Assistant Regional Director Bebiano I. Sentillas, kasama ang mga opisyal ng Lokal na Pamahalaan ng Lungsod ng Legazpi, ang host city ng palaro ngayong taon, at iba pang partner at stakeholder mula sa iba’t ibang dibisyon sa rehiyon.
Layunin ng aktibidad na ipakita na ang diwa ng palaro ay hindi lamang nasusukat sa medalya at tropeyo, kundi pati sa paghubog ng mga responsableng mamamayan—mga kabataang may malasakit sa komunidad at sa kalikasan.
Higit pa sa pagiging bahagi ng programa, nagsilbi itong paalala sa bawat atletang kalahok na ang tunay na tagumpay ay may kaakibat na pananagutan.
Mananatili ang mga punlang itinanim bilang simbolo ng pagkakaisa, disiplina, at pagmamahal sa kalikasan—isang buhay na alaala ng Palarong Bicol 2026.
Tulad ng mga atletang patuloy na nagsusumikap, ang mga punong ito ay inaasahang lalago nang tahimik ngunit matatag, bilang patunay na ang isang palaro ay maaaring mag-iwan ng pamana na higit pa sa kompetisyon.
Source: DepEd Bicol