Nagpahibalo ang City Government of Dapitan sa paghatag og libreng medical outreach alang sa kababayen-an isip kabahin sa pagsaulog sa National Women’s Month. Pagahimoon kini sa Marso 2, 2026 sa Ground Floor Lobby sa Dapitan City Government Center sugod alas 7:00 sa buntag, ug limitado sa 200 ka slots nga first come, first served.
Lakip sa mga serbisyong ihatag ang libreng medical consultation, routine breast examination, ug libreng tambal base sa reseta sa doktor. Ang inisyatiba usa ka hiniusang paningkamot sa City Government of Dapitan ubos sa liderato ni Mayor Evelyn T. Uy, sa pakigtambayayong sa Provincial Government of Zamboanga del Norte nga gipangulohan ni Gov. Dexter Darel Uy, pinaagi sa Zamboanga del Norte Medical Center nga gipangulohan ni Dr. Esmeralda Nadela.
Alang sa proseso, magsugod ang mga partisipante sa rehistro sa CSWDO uban ang pagpresentar sa Philsys ID, Birth Certificate, o duha ka government ID, dayon pag-andam sa Individual Treatment Record sa CHO, pag-encode sa datos, konsultasyon ug routine breast exam, ug pagkuha sa tambal sa botika.
Gidasig sa lokal nga panggamhanan ang tanang Dapitanas nga muabot og sayo ug pahimuslan ang maong kahigayunan, samtang gipalig-on ang kahinungdanon sa sayong konsultasyon ug preventive care aron mapanalipdan ang kahimsog sa kababayen-an.(JENIFFER JR. DELICA)
Source: City Government of Dapitan