- Advertisement -
Nakatalaan nang puonan kan lokal na gobyerno kan munisipyo kan Gubat ang construction kan Municipal Park sa laog kan municipal compound. Dara ini kan proposal kan Comprehensive Land Use Plan o CLUP sa munisipalidad na kaipuhan pa kan Gubat ki 3.29 ektarya ki daga ta nganing maitindog ang mga park asin recreation area segun sa rekomendasyon kan Housing and Land Use Regulatory Board na 500 sqm kada 1,000 na populasyon.
Pighihiling na matao sa publiko ki ligtas, mahiwas asin komportableng lugar asin recreation area ang pagkrear kan municipal park na may sapat na pasilidad na magagamit kan mga residente sa mga aktibidad na maeengganyar ang partisipasyon kan publiko sa mga event. Iyo man ini ang magiging lugar para sa exercises asin iba pang sports-related na mga aktibidad para sa mga konstituwentes.
Katakod ka ini, nagpuon na ang paggaba sa dating municipal building asin puputolon ang 19 multi-species na mga puno sa Sabado, Oktubre 16, sa permisyon na itinao kan Department of Environment and Natural Resources – Provincial Environment and Natural Resources Office Sorsogon o DENR-PENRO na may permit number na R5SOR-2021-011.
Papalitan ang mga puputolon na kahoy ki poco mas o menos 1,000 na mga punong itatanom parte kan implementasyon kan “Project Gubat sa Gubat” kan Municipal Environment and Natural Resources Office.
(Source: Sorsogon News, photos courtesy of LGU Gubat)
- Advertisement -
