Cebu City – Mitingog na si Metropolitan Cebu Water District (MCWD) Chairman Jose “Joey” Daluz III, batok sa alegasyon sa giingong pagka lambigit niya sa “under-the-table” transaction sa Cebu City Hall nga gipasangil sa usa ka road developer kinsa mi proposed nga mo bukas ug karsada sa Barangay Toong, Syudad sa Sugbo.
Mitunga sa konseho sa Syudad sa Sugbo ug mipasangil ang usa ka Ben Aratea nga rampant ang corruption sa Cebu City Hall basi sa iyang na encounter nga lain-laing “under-the-table” transaction sa mga opisyal sa syudad.
Lakip sa mga gipasanginlan sila si City Administrator Floro Casas Jr., City Legal Officer Rey Gealon, MCWD Chair Joey Daluz, gani nalakip sa gipasanginlan ang anak ni Mayor Edgar Labella nga si Jaypee.
Sila si Casas ug si Gealon pulos mihimakak sa pasangil ug nagplano kini nga mopasaka ug kaso batok kang Aratea gumikan sa giluwatan nga “ungrounded statements” sud sa konseho ngadto kanila.
Sa Daluz sa iyang bahin, dili unta motubag sa pamasangil ni Aratea gumikan kay gihulagway niya kini nga speculative ug untruthful, pero nahadlok siya nga ang iyang pagpakahilom sabton kini ug dili mao.
Matod ni Daluz nga kaduha ka higayon lang siya naka kita kang Aratea; Sa iyang capacity isip consultant ni Mayor Edgar Labella, gikonsulta kini labot sa proyekto ug tungod kay pipila sa kliyente sa iyang private practice, dunay mga property nga na apektuhan sa operation ni Aratea sa Pardo.
“I really have to comment kay kani these are lies perpetrated by Aratea. First, when he asked us to help him, ingon siya nga naa siyay mining claim sa Pamutan, several hectares of mining claim. So niingon siya nga since naa may plano ang syudad nga mag-open ug road at no cost to the city,” matod ni Daluz.
Gihangop pirmiro sa city government ang maong tanyag tungod kay nagpasabot kini nga dili na maka gasto ang syudad ug P150 million alang sa pag abli ug karsada, ug ang savings ma gasto sa ubang serbisyo sa syudad.
Nagkanayon si Daluz nga iyang gi advise san si Aratea nga mokuha ug permit ug makig negotiate sa mga tag-iya nga apektado sa properties, kinsa mihangop pirmiro nga dunay buksan nga karsada sa ilang lugar;
Apan nagsugod ug reklamo ang mga property owners gumikan kay matod pa nga imbes mag himo ug karsada si Aratea, nag ugmad naman hinoon kini ug minahan.
Gihimakak ni Aratea ang maong pasangil ug mi depensa nga ang gipang himo lakip sa construction.
Matod pa nga kini hinungdan nga gipahunong ang operation ni Aratea pinaagi sa cease-and-desist order gikan sa City Environmental and Natural Resources Office (CENRO).
“Nag quarry siya, so gipaundang siya. Kanang moingong siya’g nanghatag siya’g kwarta, og nanghatag pa siya’g kwarta, di wa siya paundanga. The fact nga gipaundang siya, naglagot tingali,” sigon pa ni Daluz.
Gipahibaw ni Daluz nga ang iyang ikaduhang meeting ni Aratea, gisultihan na sa opisyal ang developer nga ipahunong na ang iyang operations tungod kay daghan nang mi reklamo.
Gihimakak sab sa MCWD Chairman nga nanag-iya siya ug property sa dool o sa palibot sa operation area ug wa sab matod pa, mo tanyag ug ₱ 500 matag truckload nga bayad ngadto kang Aratea.
Buot ni Daluz nga mopasaka ug kaso si Aratea batok sa tanang opisyal nga gitumbok niini sa iyang testimonial ngadto sa konseho aron maka tubag sila sa proper forum.
Sa pagka karon, nag huna huna pa ang MCWD chairperson kung mopasaka ba ug kaso o dili batok kang Aratea; pero matod niini nga iya unang tun-an ang lakang.
Gihagit ni Daluz nga mohatag ug proof si Aratea sa iyang pamahayag ug hunongon ang pagpang daut sa reputasyon sa mga opisyal alang sa iyang personal interest.
Sa naunang pamahayag ni Aratea, gibarugan niini nga wa siya mahadlok pag atubang sa consequences sa iyang gipang butyag tungod kay matod pa, kadto maoy kamatuuran.
(News & photo courtesy of Cebu City Council | MCWD Chairperson Jose “Joey” Daluz)