Cebu City – Gipasalig sa contractor sa transfer station Inayawan, Cebu City nga mahibalik sa normal ang kahimtang sa naasoyng transfer station.
Si Joseph Javier, general manager sa DOCAST, mitingog na sa isyu sa transfer station nunot sa reklamo sa barangay sa kasamtangang kahimtang ug management sa basura.
Giangkon ni Javie4r nga naa silay problema sa kontrata sa ARN Central Waste Management, ang tagduma sa Binaliw Landfill hinungdang gipugngan na sila paglabay og basura sa naasoyng landfill.
Una niini, migawas ang dokumento nga naglatid sa utang sa DOCAST sa ARN nga kantidad ogP18 milyon sa piniling mga buwan sa 2020 ug 2021.
Suma pa ni Javier, gisuwayan na nila pagsulbad ang problema ug mipasalig nga dili malambigit niini ang kagamhanang local kay sa DOCAST ug ARN sa man kini.
Pagkakaron, gilabay sa DOCAST ang basura sa siyudad sa usa ka landfill sa Consolacion sugod niadtong Hunyo25.
Matod ni Javier, ang pagbalhin og labay sa basura gikan sa Binaliw ngadto sa Consolacion landfill ang hinungdan nganong nagtipun-og ang basura sa transfer station sa Inayawan kay padayon pa silang nag-adjust.
State of Emergency/Calamity
Nagplano si Cebu City Acting Mayor Michael Rama pagpaubos sa brgy. Inayawan sa state of emergency o calamity para madali ang solusyon sa problema sa White Road ug sa transfer station.
Atol sa press conference, si Rama miingon nga naghimo pa sila og kutay sa mga miting uban sa tanang departamento ug ahensiya nga makatabang pagpalambo sa maong lugar.
Matod ni Rama, matag adlaw magtagbo sila aron pagkuhag kalamboan sa giayo nga White Road ug pagsabot-sabot kon angay bang ipatuman ang state of emergency.
Kon mapaubos sa state of calamity ang Inayawan o ang porsyon niini, magamit na ang disaster funds pag-repair sa karsada ug paghakot sa mga basura.
Gitakdang ipakanaog ni Rama ang desisyon sa dili pa mokanaog isip acting mayor ug sa dili pa mobalik sa trabaho si Mayor Edgardo Labella karong sunod buwan human sa tulo ka semanang bakasyon.
Alang sa acting mayor, ang problema sa Inayawan nagkinahanglan og hinanaling solusyon.
Gimando ni Rama ang pag-ayo sa dan ug sa kanal sa White Road aron hapsay ang pag-agi-agi sa mga garbage trucks nga mohatod ug mohakot sa basura sa transfer station. (Jhon Tadlip/JTY)
(Source: Office of the Vice-Mayor-Cebu City | DOCAST, photos courtesy by Kirk Brian Repollo)