Naragsakan ni Gob. Matthew Marcos Manotoc iti pannakapasingked iti naminsan pay a gundaway ti panagtalinaed ti Solid North.
Daytoy ket kalpasan a balligi a nairubuat ti I’m IN LUV a tawag iti “Tourism Marketing and Promotions Partnership iti nagbaetan ti Ilocos Norte ken La Union.
Impalgakna a dakkel a pakaidayawan ti probinsia ta pinatgan ti La Union ti kiddaw ti Ilocos Norte a panagbinnuligda a mangitandudu iti benneg ti turismo ditoy rehion uno kangrunaanna iti nagbaetan dagitoy a probinsia.
Nagyaman ti gobernador iti kinamannakigayyem ti nadakamat a probinsia ken ti pannakitinnulongna iti pannakaipursigi ti nasao a programa iti benneg ti turismo.
Kagiddan daytoy, impadanon ni Gob. Manotoc ti panangkablaawna iti La Union iti panagbalinna a “premier surf town” iti pagilian.
Imbatadna a maysa daytoy kadagiti kalkalikagumanna a maaramid probinsia. iti Mangnamnama ti gobernador a babaen iti baro a programa a pakikammayetan ti probinsia iti La Union ket masursuro ti Ilocos Norte dagiti inaramid ti nadakamat a probinsia iti pannakabigbigna iti benneg ti “surfing”.
Inbunannagna nga ibilbilang ti gobierno probinsial ti La Union a kas mapagwadan a kabinnulig iti probinsia iti turismo.
Innayon ni Gob. Manotoc saan laeng a kalkaiikaguman ti probinsia a maawis dagiti taga La Union nga umay ditoy Ilocos Norte ngem kalikagumna pay a dagiti turista nga umay ken pumanaw ditoy probinsia ket agsardengda met iti sumagmamano nga aldaw wenno rabii idiay LU.
Dakkel ti namnamana nga agtultuloy ti napintas a relasyon dagiti dua a probinsia nangnangruna iti daytoy a gundaway a nairubuaten ti I’m IN LUv. (Ronald Domingo, RPN DZRL Batac Correspondent)
(Source: Provincial Government of Ilocos Norte)