Cebu City – Moabot og ₱ 13 milyones ang banabanang kantidad sa mga lata sa butane nga nasakmit sa mga sakop sa National Bureau of Investigation o NBI 7 nga nangronda sa tulo ka barangay sa dakbayan sa Talisay, Cebu sa miaging semana.
Gawas sa mga canister, nadakpan usab ang siyam ka tawo sa maong raid sa barangays Cansojong, Jaclupan ug Tabunok.
Base sa reklamo nga nadawat sa NBI gikan sa usa ka pribadong kompaniya, nagtukod og refilling station ang ilang suki sa Talisay sa illegal nga paagi.
Gawas sa refilling backyard, namaligya usab kini og mga butane nga wa mahisubay sa gimbut-an sa DOE o Department of Energy ug sa Section 170 sa Republic Act 8293 o Intellectual Property Code of the Philippines.
Tungod niini, gironda sa NBI ang refilling station gamit ang search warrant nga giisyo ni Judge Ramon Daomilas sa RTC Branch 11.
Ang pagmontar og refilling backyard sa butane giisip nga makuyaw sa pag-ulbo sa sunog.
Gani, niadtong Setyembre 24, sa miaging tuig, nasunog ang usa ka balay nga gihimong butane refilling station sa Sitio Dawis, Brgy. San Roque.
Daghang tangke sa LPG o liquefied petroleum gas ang mingbuto sa maong sunog.
(Jhon Tadlip/JTY, photo courtesy of contributed photo)
(Source: NBI-7)