Cebu City – Gisupak sa konseho sa dakbayan sa Sugbo ang ₱ 40 milyon nga gahin aron ipamalit og mga pinutos nga pagkaon alang sa mga frontliners lakip sa mga polis ug health staff sa quarantine centers.
Wala makauyon ang mga konsehal sa tinguha sa executive department pag gahin og dugang ₱ 40 milyon para sa food packs sanglit naka gasto na ang siyudad og ₱ 160 milyon gikan sa Hulyo ngadto sa Nobyembre.
Atol sa uwahi nilang regular session, si Konsehal Nestor Archival, minority floor leader, nangayo og liquidation ug procurement sa mga pinutos nga pagkaon nga giapod-apod sa mga frontliners.
Sa iyang bahin, gikuwestiyon usab ni Bise Mayor Michael Rama ang dugang badyet tungod kay wa man siyay nakitang dokumento sa gihatag nga mga food packs ug kon nadawat ba gyod kini sa mga benepisyaryo.
Samtang si Konsehal Raymond Garcia, majority floor leader, mihangyo sa konseho nga aprobahan ang dugang ₱ 40 milyon kay nagkinahanglan ang mga frontliners ug mga pasyente og pagkaon.
Matod ni Garcia, ang unang ₱ 160 milyon nagasto na sa pagkaon sa kapin sa usa ka libo ka front-liners ug pasyente dihang misulbong pag-ayo ang pandemic niadtong Hulyo.
(Jhon Tadlip/JTY)
(Source & photo courtesy of Office of the Vice Mayor-Cebu City)