Posible nga kasugdan na ang ikaduhang hugna sa SUGBUsog o Sugboanong Busog, Luwas ug Himsog sa kalungsoran sa Sugbo karong Mayo.
Matod pa, usa sa angayng atngan sa mga tawo ang indigay sa best LGU o local government unit.
Base sa impormasyon sa Kapitolyo, gitakda ang evaluation karong Marso 22 ngadto sa26 sa barangay level; Abril 5 ngadto sa 9 sa municipal level; Abril 12 ngadto sa 16 sa district level; ug Abril 19 ngadto sa30 sa provincial level.
Ang mga kategoriya sa indigay gilangkoban sa best household ug best purok sa barangay level, best barangay sa LGU ug district levels; ug grand champion sa household, purok, barangay ug LGU levels.
Si Dr. Roldan Saragena, pangulosa Provincial Agriculture Office, miingon nga makakuha og dugang puntos ang mga entrante nga magbuhi og manok-bisaya ug aquaponics system sa pagbuhi og isda.
Matod ni Saragena, naka-download na ang Kapitolyo og mokabat sa P100 ka libo nga pundo sa mga LGUs para sa mga barangay, samtang laing P1 kamilyon sa mga syudad ug kalungsoran.
Sa maong pundo, katunga ang alang sa pagpalambo sa mga nurseries ug katunga usab sa pagpatuman sa naasoyng programa.
via Jhon Tadlip/ JTY
Source/Photo : Cebu Provincial Government