Nagapadayon karon ang hugtanong pagpatuman sa “minimum health protocols” dinhi sa tibook dakbayan sa Dipolog. Kini ang nasayran pinaagi sa report nga giluwatan ni Atty. Poe Bagarinano atol sa gipahigayon nga City Peace and Order Council (CPOC) 3rd Quarter meeting kani-adtong Huwebes, Hulyo 29, 2021, sa may alas 9:00 sa buntag, pinaagi sa Google Meet.
Matud pa ni Atty. Bagarinao, City Legal Officer ning dakbayan, kinsang buhatan ang maoy nanguna sa legal nga aspeto sa implementasyon sa Anti-Covid Ordinance lakip na ang pagpatuman sa minimum health protocols dinhi sa dakbayan, nga moabot na sa 13,248 ka mga citation tickets ang na-issue sa mga implementors ngadto sa mga violators sa maong ordinansa sukad pa sa mi-aging tuig.
Dugang pa ni Atty. Bagarinao nga gikan sa kinatibuk-ang 13,248 nga nakalapas, miabot 8,195 ang nakabayad na sa multa sa ilang mga kalapasan. Miabot sa 4,250 sa mga violators ang boluntaryo nga mipailawom sa “community service” isip bayad sa ilang kalapasan, ug miabot sa 203 ka mga violators ang gipasakaan na ug kaso sa korte. Aduna usab 600 ka mga menor de edad ang naisyuhan ug citation tickets tungod sa lain-laing kalapasan.
Sigun sa maong report, ang mga nanag-unang violations sa Anti-Covid Ordinance mao ang wala paggamit ug face mask, paglapas sa curfew hours, ug ang wala pagtuman sa social distancing sa katawhan.
Sa pagka-karon, miabot na sa 536 ka mga implementors ang na-deputized sa kagamhanang lokal sa Dipolog pinaagi sa mga personahe sa City Legal Office. Gikan niini, aduna’y 29 ka mga personahe ang gikan sa PNP, 50 ang gikan sa kagamhanang local sa Dipolog, ug 457 ang deputized nga personahe gikan sa mga kabarangayan.
Bisan pa man niini, aduna pa’y dugang nga mga implementors nga ipa-ilawom ug orientation sa umaabot nga adlaw aron padayon ang hugtanong pag-implementar sa “minimum health protocols” sulod sa dakbayan sa Dipolog.
(News and photos courtesy of Dipolog City Government Facebook page)