Cebu City – Ubos na karon sa pagduma ni House Speaker Lord Allan Velasco ang amihanang distrito sa dakbayan sa Sugbo isip caretaker.
Natudlo si Velasco nga caretaker sa distrito nunot sa kamatayon ni Kong. Raul Del Mar niadtong Lunes sa gabii.
Kini agig sanong sa panugon sa namatay nga gipahibawo sa mga kabanay sa magbabalaod.
Suma pa sa pamilyang del Mar, buot sa kongresista nga si Velasco ang motan-aw sa North District kon wana kini.
Nasuta nga si Velasco suod sa banayng del Mar.
Opisyal nga gitudlong caretaker si Velasco sa miaging adlaw dihang gitugpo siya ni Deputy Majority Leader Xavier “XJ” Romualdo agig tuman sa tinguha sa namatayng kongresista.
Gidawat usab dayon ni Presiding Deputy Speaker Aurelio “Dong” Gonzales Jr. ang nominasyon kay wa may mingsupak.
Gani, si Kong. Rodrigo “Bebot” Abellanosa sa habagatang distrito sa siyudad mipadayag man og suporta sa appointment ni Velasco isip caretaker sa distrito ni del Mar.
Si Del Mar usa unta sa mga deputy speaker ubos sa pamunoan ni Velasco.
Ubos sa balaod, ang caretaker sa usa ka distrito kinahanglang ihatag sa usa ka incumbent nga kongresista kon kini opisyal nga ilhong bakante.
(Jhon Tadlip/JTY, photos courtesy by: Speaker Lord Allan Velasco’s & Rep. Raul del Mar’s Facebook pages)
(Source: House of Representative 18th Congress)