Cagayan De Oro City – Wala nay panagdasok sa katawhan alang sa Higalaay Festival nga himuon karong tuiga alang sa kapistahan ning syudad. Kini tapos himuon na nga online o virtual ang set-up niini ug minimum health safety protocols na lamang ang gikinahanglan, matud pa ni Mayor Oscar Moreno sa press briefing sa nakalabay nga adlaw.
Apan gipasabatot sa mayor nga ang selebrasyon sa fiesta, usa ka relihiyosong kalihokan mao nga usa sa maghighlight niini nga higayon mao ang pag-installar ni Archbishop Jose Cabantan isip bag-ong arsobispo sa Archdiocese sa Cagayan de Oro. Si Cabantan mao ang mopuli kang outgoing Archbishop Antonio Ledesma diin himuon ang simple rites sa Agosto 28. Nakigkita na ni Moreno sa City Police ug sa Incident Management Team sa City Disaster Risk Reduction Management Department o CDRRMD aron sa pagfinalize sa security measures alang sa maong kalihokan nga sa ingon malikayan ang pagpunsisok sa mga tawo.
Matud pa ni City Tourism Chief Chedilyn Aissa Dulguime nga dugang detalye sa mga core ug parallel events alang sa karong tuiga nga Higalaay Festival nga ipaagi sa Facebook page ang ila ra unyang ibutyag. Ang pagpahigayon sa uban pang kalihokan sama sa Kumbira Food Festival ang himuon gihapon online aron masunod ang minimum health standards, dugang pa ni Dulguime.
Gipasalig ni Mayor Moreno ug Dulguime ngadto sa mga product sellers nga mahimo gihapon sila makabaligya sa publiko pinaagi sa festival’s Facebook page.
Ang Miss Cagayan de Oro pageant himuon usab nga online samtang ang annual fluvial parade adunay 10 lamang ka mga partisipante inay nga 50 susama sa nakalabay nga tuig. (City Information Office)