Inpabus-oy ni Gob. Matthew Marcos Manotoc iti Provincial Agriculture Office a mangngeddeng iti pakausaran ti gunguna ti probinsia iti panagbalinna manen a maysa kadagiti kaaddoan ti naapit nga irik.
Segun kenkuana, adda pay ketdin ti inpakaammo kenkuana ni Provincial Agriculturist Mrs. Norma Lagmay a kalikagumna a pakausaran ti uppat a milyon a pisos a gunguna ti probinsia iti pannakairamanna manen iti ’’Top Ten Rice Achievers’’ ti pagilian.
Inlawlawagna a ti nadakamat a pangopisinaan ti nagbannog iti panangiyalat ti probinsia iti nasao a pammadayaw rason a maiparbeng a dagitoy ti mangkita iti pakaaramatanna ti nasao a kantidad.
Imbatadna a ti tarigagay ti provincial agriculturist a pakaaramatan ti gunguna ti probinsia ket maigatang iti ‘’service vehicle’’ ti nadakamat a pangopisinaan.
Innayunna a sidadaan a mangsuporta iti nasao a kalikagum gapu ta mamati a dakkel ti maitulong daytoy tapno ad-adda pay a matulungan dagiti mannalon a mangpasayaat iti produktoda iti kataltalonan. (Ronald Domingo,  RPN DZRL Batac)
(Source: Provincial Government of Ilocos Norte)