Indauloan ni City Mayor Michael Marcos Keon kadduana ni City Tourism Officer, Ms. Ana Carmela Remigio, iti panagbisita kadagiti nadumaduma a booths iddiay Aurora Park.
Ti nasao nga aktibidad nga inyuswat ti siudad ti Laoag para iti daytoy a Christmas Season ket nakipartisiparan dagiti micro, small and medium enterprises (MSMEs) manipud iti probinsia ken nadakamat a siudad nga addaan tema a “Gumatang Kayon! Trade Fair”.
Gagem daytoy ket iti pannakatal-o kadagiti lokal a produkto ken kas tulong ti gobierno ti siudad kadagiti naawanan iti pagsapulan ken dadduma pay a naapektaran gapu iti pandemya wenno iti COVID-19.
Kabayatanna, inawis garud ti mayor dagiti umili a mapan bumista iddiay Aurora Park a nakaiyuswatan ti nadakamat a Trade Fair tapnon ipakita ti suporta ken tulong kadagiti MSME’s ditoy probinsia. (Alyssa Pagdilao, RPN DZRL Batac Correspondent)
(Source: LGU-Laoag City)