Davao City – Nasakpan nga nameke og iyahang RT-PCR Test Result ang usa ka pulis nga na-assign sa Philippine National Police Crime Laboratory sa Rehiyon Onse.
Atol kini sa pag-abot sa pulis nga si P/Lt. Joy Line Cumbao sa F. Bangoy International Airport niadtong Disyembre 10, diin natino nga wala diay kini mipailawom sa testing.
Si Cumbao usa ka Forensic Officer sa PNP Crime Lab Eleven.
Gikompirma mismo ni PNP Crime Lab XI Director P/Brig. Gen. Steve Ludan, nga falsified ang gi-presenta ni Cumbao nga negative RT-PCR Test result.
“Wala siya mipailawom sa RT-PCR test alang sa unang semana o ikaduhang semana karong bulan sa Disyembre 2020. Walay na-issue kaniya nga RT-PCR [result],” sumala ni Ludan.
Dugang ni Ludan nga gipasakahan dayon nila og kasong administratibo nga grave misconduct ug grave dishonesty si Cumbao, ug kung mapamatud-an nga sad-an, ma-dismiss kini sa serbisyo.
Sumala pud ni City Tourism Officer Generose Tecson, namakak pud si Cumbao sa pag-ingon nga nag-ka-problema ang server sa Camp Crame diin kini matud pa mipailawom sa Covid-19 test.
“Misulay siya nga maka-ikyas sa iyahang sitwasyon, mi-ingon siya nga nag-down ang server sa Camp Crame diin siya gi-test. Gipa-access namo sa iyaha. Walay nakita nga medical test. Dihang gi-check namo ang Crame, walay migula nga resulta,” sumala ni Tecson.
Subling pahimangno ni Tecson ngadto sa mga pasahero nga sigurohong tinuod nga resulta sa RT-PCR test ang i-presenta sanglit dunay pamaagi ang mga otoridad aron pag-susi niini.
Daan napud nga nagtambag si Davao City Mayor Sara Duterte ngadto sa mga pasahero nga dili na kinahanglan mameke og RT-PCR test results sanglit dunay libre nga ginahanyag niini ang lokal nga kagamhanan.
(Michael Manguhig, OIC RPN DXKT Davao, City Government of Davao file photo)