Iriga City — Nag-aandam na an Brgy. San Francisco sa posibling pagsarado kan mga kampo santo sa panahon kan undas. Ini man an nagin pahayag ni PB Marc James Temenia, matapos na maka-olay kan Radio Ronda, mientras na pinaghahalat pa an pinal na direktiba ni Alcalde Madel Yorobe Alfelor kan cuidad nin Iriga.
Alagad naglalaom an kapitan na masunod an cuidad sa nainot ng kasuguan kan IATF asin DILG na ikandado an gabos na kampo santo sa nasyon poon petsa 29 kan Oktobre hasta petsa 4 kan Nobyembre, tanganing maibitaran an pagsuruksukan kan mga tawo sa mga kampo santo.
An Brgy. San Francisco iyo an kinakamugtakan kan pinakadakulang Kampo Santo digde sa cuidad nin Iriga, kasabay naman kan pahayag ni temenia nan aka-andam man sinda sa pagpapa-utob kan patakaran na ilalatag kan city government.
Mientras tanto, nangapudan pa an kapitan sa mga taga San Francisco na pirming sunudon an health protocol mientras na nagrarambong an mga kaso kan Covid sa cuidad.
Alagad nagpahayag nin kaogmahan an punong barangay huli ta saro an saiyang barangay sa padagos pang Covid free sa cuidad nin Iriga. (OIC Melvin Barayoga, RPN DZKI Iriga)
(Source: Interview with Marc James Temenia)