Iriga City — Biyahe kan provincial bus dai pa mangyayari ngunian na aldaw sa probinsya nin Camarines Sur asin iba pang parte kan Bicol, ini kasunod kan dai pa pagtugot kan mga local na opisyal huli sa pagkatakot na mas pang magkuriyat an kaso kan Covid-19 en kaso tugutan na an buelong pagpuruli kan mga LSI.
Inot kaini, naghahalat sana an mga operators en kaso magtao nan in go-signal an LTFRB sa saindang operasyon, alagad sigun sa sarong operator nan aka-olay kan radio ronda dai pa nin permiso sa ruta kan Bicol asin an natugutan pa sana iyo an mga bus pasiring sa Southern Tagalog Region ngunian na aldaw.
Naglalaom an mga ini na sabay na sanang ma-operar an mga bus pasiring sa kabisayaan asin sa rehiyon kan Bicol, mientras na nagkakaigua pa nin orolay sa magigin protocol.
Maski si Dr. Rey Millena, an provincial health officer kan CamSur an naghagad nin paliwanag sa LTFRB na linawon sa paagui nin datus na salbado na an pagbiyahe kan mga bus mientras na yaon sa tahaw kan Covid-19 pandemic. (OIC Melvin Barayoga, RPN DZKI Iriga)
(Source: Interview with Provincial Government of Camarines Sur)