Cebu City – Mokabat ug 600 ka mga manindahay sa Carbon Market sa dakbayan sa Sugbo ang ibalhin samtang himoon ang civil works alang sa pag-usab sa dagway sa merkado karong buwana.
Si Irvin Caballes, pangu sa MOD o Market Operations Division, miingon nga ang groundbreaking ceremony sa phase 1 sa proyekto himoon karong Marso 17.
Sa nasayran, ang proyekto abagahon sa Megawide Construction Corporation diin ang Phase 1 mogasto na og hangtod sa ₱ 5.5 bilyon.
Gisayran ni Caballes ang mga reporters nga ilanang nailhan ang labing minos 600 ka vendors sa habig sa Freedom Park ug Warwick sections sa Carbon nga apektado sa unang bahin sa proyekto.
Matod ni Caballes, giduso na nila sa Megawide ang apektadong mga manindahay bisag padayon pa silang naghimog imbentaryo.
Suma pa niya, ang Carbon Redevelopment Oversight Committee nagtinguha pag-finalize sa ilang imbentaryo sa mga vendors nga apektado sa proyekto.
Midugang si Caballes nga sa higayong mahuman na ang groundbreaking ang mga kawani sa Megawide maghimo dayon og temporaryong mga stalls sa Unit 2 nga kabutangan sa apektadong mga manindahay. (Jhon Tadlip/JTY)
(Source: Market Operations Division – Cebu City, photo courtesy of Cebu City Public Information Office)
