Cebu City – Gitakda nang sugdan sa dakbayan sa Lapu-Lapu sa City Hospital ang pagpamakuna batok sa covid 19 karong adlawa, Marso 9.
Mao kini gitug-an ni Dr. Ronald Oporto, medical chief sa city hospital, diin siya ang unang magpabakuna atol sa ceremonial vaccination.
Magpabakuna si Oporto, bisag nakuyawan siyag gamay, kay misalig siya sa ka epektibo sa bakuna sa Sinovac.
Suma pa niya, wa siya magtuo nga siyay unang bakunahan kay nagtuo man siya nga si Mayor Junard Chan ang una.
Gitug-an ni Oporto nga sa 226 ka kawani sa city hospital, 110 lang ang miuyon nga magpadapat sa CoronaVac.
Midugang siya nga ang Department of Health o DOH-7 nakagahin na og 220 ka doses sa Sinovac vaccines sa Lapu-Lapu nga igo sa duha ka pagtulpok.
Dungan nga bakuhan ang upat ka doktor ug head nurse, mosonod mang laing lima ka staff sa hospital sud sa medical tent sa Lapu-Lapu City Hospital.
Matod ni Oporto, target nila nga mahuman ang pagdapat sa unang shot sa bakuna sud sa tulo ka adlaw.
Ang matag kawani nga miuyon sa pagpabakuna kinahanglang mopirma og waiver.
Gipasalig ni Oporto nga ila dayong atimanon kadtong mga front-liners nga magpakita og adverse reaction sa bakuna. (Jhon Tadlip/JTY)
(News & photo courtesy of Lapu-Lapu City Hospital)
