Mas gipahugtan pa ang pagpangandam sa Probinsya sa Davao de Oro human gideklara sa Department of Health (DOH) ang unang kaso sa Corona Virus Disease 2019 (COVID-19) sa Davao Region kagahapun.
Ang pasyente nailhang babaye nga byante uno ang edad ug residente sa Pantukan, Davao de Oro. Human ming gawas ang resulta, gikumpirma sa Research Institute of Tropical Medicine (RITM) nga nag positibo sa virus. Kasamtangang naka confine sa Davao Regional Medical Center (DRMC) ang pasyente ug nahibal-ang gikan diay kini sa United Kingdom, miagi sa Doha Qatar, Manila ug miabot sa Davao katong February 29, 2020.
Matud pa sa opisyal nga pahayag sa DOH, ginaatiman na gayud nila ang pasyente nga stable ang kondisyon niini ug padayon kining nagapaayo sa pagkakarun.
Minghatag ug mensahe si Governor Jayvee Tyron Uy nga “Buot nakong ipaniguro kaninyo nga ang Provincial Government of Davao de Oro kauban ang atong mga municipal local government units, ug DOH nagatinabangay para himuong luwas ang matag usa kanato sa risgong dala sa COVID-19”.
Nagdeklara na’g suspension sa klase ang onse ka munispyo sa probinsya arun malikayan ang posibling pagtakud sa virus.
Gipanguluhan ni Governor Jayvee Tyron Uy ug Vice-Governor Maria Carmen Zamora ang Provincial Inter-Agency Task Force COVID Meeting nga gitambong sa tanang Municipal Mayors, Health Officers, Municipal Disaster Risk Reduction and Management Officers (MDRRMO), Provincial Government Department Heads, Hospital Chiefs ug uban pang stakeholders.
Atol sa agenda sa meeting mao ang musunod; Alert Level/Executive Order, HR Concerns, ug mga Plano sa Munisipyo, Hospital, ug PDRRMO/MDRRMO mahitungod sa COVID-19.
Apil sa mga pahimangno sa atong mga local government units ug DOH ang social distancing, paghugas sa mga kamot pinaagi sa sabon, alcohol ug uban pa arun masigurong limpyo ang panglawas. Kung galing, makabati kita’g mga sintomas, adto dayon sa pinakaduol na mga rural health units, barangay health centers, ug mga ospital etc.
“Maminaw kita sa mga advisories sa atong mga lokal nga panggobyerno ug sa DOH. Usab, ginahangyo namo ang inyong kooperasyon. Magpabilin kitang magbinantayon, alerto ug kalmado. Walang iwanan ta sa Davao de Oro”, Uy miingon. (Rheafe Hortizano, ID DAVAO DE ORO).