Walay nadungag nga positive case sa COVID-19 sa probinsya sa Sarangani sa nakalabay nga Disyembre 24 ug Disyembre 25, bisperas ug adlaw sa Pasko, inay aduna pay naka-recover sa balatian. Usa (1) lang pud ang natala nga napaso sa paboto nga sparkler sa Pasko, usa ka minor injury lamang subay sa report sa Sarangani Provincial Health Office, taga-Maitum.
Baynte dos (22) kabuok karon ang active cases sa Sarangani Province tungod sa trese (13) ka mga indibidwal puros tanan taga-Maitum ang nadungag sa listahan nga naigo sa Coronavirus. Dise sais (16) kabuok ang active cases sa Maitum, duha (2) sa Malungon, duha (2) pud sa Malapatan, usa (1) sa Maasim, ug adunay bag-ong usa (1) sa Alabel basi sa Department of Health bulletin kagabii. Zero case na wala nay natalang active case sa Glan ug Kiamba sa kasamtangan.
Sige og pahimangno si Governor Solon kauban ang pito (7) ka mayor nga dili magkumpyansa tungod posibleng musaka ang ihap sa matakbuyan sa COVID-19 gumikan sa daghang okasyon nga ginapahigayon sa Kapaskuhan ug sa pagsugot sa bag-ong tuig. Gani, nabatyagan na karon ang subling pagsaka sa ihap didto sa Metro Manila.
Gibutyag ni Governor Solon nga sayang ang pagpaningkamot kung karon pa maigo sa Coronavirus nga hapit na ang pagbakuna sa Pilipinas. Dili maayong palihi ug dili lalim ma-quarantine ug ma-isolate samtang gasugat o anaa sa sayong bahin sa bag-ong tuig.
Samot na kung mabuthan sa mga paboto ug ubang firecracker ang lawas. Maong amping matud pa sa Coronavirus, ug mutuman sa “Oplan Iwas Paputok” sa gobyerno.
(Provincial Information Office – Sarangani)