Cebu City – Gitakli na sa “search & retrieval” gikan sa “search & rescue” ang operation sa pagpangita sa unom ka missing sa pagkahunlak sa minahan sa CCC o Carmen Copper Corp. sa dakbayan sa Toledo, Cebu lima ka adlaw ang nakalabay.
Si John Roseller Layan, information officer sa Toledo, miingon nga nagsugod ang search and retrieval operation sa milabayng Pasko.
Apan hangtod sa miaging adlaw, liwas sa Pasko, wa pa gihapon mapalgi ang mga biktima.
Sa nasayran, ang mga gipangita mao sila si Jose Carpentero, Jonwel Herediano, Simeon Laconas, John Paul Resuelo, Renante Sepada ug Alfred Tautho.
Samtang upat patay nga unang naugkat mao sila si Junil Lagola, Ernesto Caspe, Juan Tapang ug Dionisio Labang.
Gipahibawo usab ni Layan nga buot sa kagamhanang local nga pabakweton ang 400 ka pamilya o duha ka libo ka tawo nga nagpuyo sud sa 500 metros nga radius gikan sa nahiaboan sa landslide sa brgy. Biga karong semanaha.
Suma pa ni Layan, giandam na nila ang temporary evacuation center alang sa nahisgotang mga pamilya.
Gawas sa evacuation center, aduna usay help desk nga ilang ibutang sa lugar aron pag-abag sa mga evacuees. (Jhon Tadlip/JTY)
(Source & photo courtesy of Toledo City Public Information Office)