CAGAYAN DE ORO CITY- Pabiling gibarugan ni Gobernador Bambi Emano sa probinsya sa Misamis Oriental nga wala pay local transmission sa coronavirus sa maong dapit bisan pa nga naa nay narehistro nga positive cases niini. Kini tungod kay ang tulo nga nagpositibo sa maong virus usa ka returning Filipino worker ang duha mga locally stranded individuals.
Ang unang kaso, usa ka 29 anyos nga lalaki nga gikan Saudi Arabia nga nakauli sa iyang pinuy-anan sa lungsod sa Libertad niadtong Hunyo 6. Ang laing duha mao ang 30 anyos nga amahan ug usa ka tuig niyang anak nga gikan sa Manila ug mipauli sa Gingoog City.
Ang Provincial Task Force for Covid-19 misalikway sa posibilidad sa community exposure tungod kay ang tulo gipahiluna man sa isolation facilities nga gimugna sa ilang tagsa-tagsa ka dapit.
Matud pa ni Emano nga ang task force naningkamot nga mapugngan ang virus ug malikayan ang local transmission sa probinsya. Masaligon siya nga mahinagbo niini ang mga hagit paghatag seguridad sa mga Misamisnon.