Cebu City – Gihangyo ni Gob. Gwendolyn Garcia ang national IATF o Interagency Task Force nga pasagdan lang ang Sugbo nga mopatuman sa policy niini ngadto sa mga ROF o returning overseas Filipinos nga taga Sugbo.
Gipasabot ni Garcia nga ang sitwasyon sa Sugbo mahimong lahi ra sa ubang bahin sa nasod ug nga gusto sa kagamhanang probinsiyal nga maka daginot sa gasto ang mga Sugboanon sa masa napu ka adlaw nga kwarantina sa hotel.
Ang mga ROF nga nagpuyo sa probinsiya sa Sugbo motuman sa swab-upon-arrival policy, home quarantine, ug  swab na pod sa ikapitong adlaw.
Gipasupot ni Garcia ang maong pamahayag sa iyang speech atol sa special session sa hunta probinsiyal gahapon.
Suma pa niya, kadtong igo lang moagi sa Cebu isip entry point apan dili taga Sugbo, ipaubos na sa napu-ka-adlaw nga kwarantina sa hotel.
Ang mga sakop sa IATF nagda og mga eksperto sa DOH o Department of Health ug sa WHO o World Health Organization aron pagtuki bahin sa bag-ong variant nga naka apektar na sa labing menos 85 ka nasod sa kalibutan.
Si Dr. Edsel Maurice Salvaña sa DOH Technical Advisory Group miingon nga ang Delta variant sa Coronavirus Disease o COVID-19 usa ka major concern nga angayng ikonsiderar sa protocol sa airport. (Jhon Tadlip/JTY)
(News & photos courtesy of Cebu Provincial Government)