Cebu City – Gibuhi pag-usab sa tagtukod sa Kusug o Kugi Uswag Sugbo ang local nga Partido sa dakbayan sa Sugbo agig pangandam sa eleksiyon sa Mayo 2022.
Si kanhi Mayor Alvin Garcia, founder sa Kusug, ang nangu sa kalihokan sa pagbanhaw sa grupo nga gitambongan ni acting Mayor Michael Rama ug Secretary Michael Dino sa OPAV o Office of the Presidential Assistant for Visayas gahapon sa hapon sa Radisson Blu Hotel.
Si Konsehal Raymond Garcia, majority floor leader, ang unang nagpahibawo sa pagbanhaw sa Kusug.
Ang Partido Kusug na rehistro sa Comelec o Commission on Elections human maumol niadtong tuig 2000.
Suma pa batan-ong Garcia, ila lang gigamit ang ilang katungod sa pagtukod og Partido kay upat ka buwan na lang, ting-file na sa certificate of candidacy.
Giangkon sa konsehal sa north district nga posible nga dunay mahitabong kwalipikasyon sa lokal nga mga partido kansang membro magkaalyado ra.
Ang iyang gipasabot mao ang Partido Panaghiusa ni anhing Inday Nita Cortez Daluz nga gidumala sa iyang anak nga kanhi konsehal ug karon chairman sa board sa MCWD o Metro Cebu Water District, Jose Daluz III, ug ang Partido Barug ni Rama ug Labella nga sa miaging eleksyon nakig-alyansa sa PDP-Laban.
(Jhon Tadlip/JTY)
(Source: KUSUG, photos courtesy by Ramil Ayuman)