Pormal nang na-i-award sa Gobyerno Probinsyal kan Sorsogon an ISO Certification 9001-2015 gikan sa standard-setting body bilang patunay sa mas de kalidad asin efficienteng serbisyo sa namamanwaan kan Sorsogon an naitatao kaini.
Segun kay Gobernador Francis Joseph “Chiz” Escudero an pagresibe kan probinsya kan siring na certifico gikan sa Certification International Philippines Inc. o CIPI sarong asigurasyon na maipapadagos an pinonan niyang matanos na serbisyo sosog sa international standards.
“Sorsoganons will be assured of quality and efficient service from all the 22 offices of the provincial government, including how our employees will provide the services they need. With this quality management system, corruption in our local government offices would be eradicated if not lessened.” pahayag kan gobernador.
An Switzerland-based ISO iyo an sarong standard-setting body na kompuesto nin mga eksperto gikan sa iba-ibang nasyon na reconocido sa paglatag nin sistema sa de kalidad na manihasyon sa paagi kan mga dokumentadon proseso kan opisina asin pag atendir kan mga responsibilidad.
Kaibahan sa pigkonsiderar an professionalization kan mga empleyados para sa matanos asin de kalidad na serbisyo.
Tinawan nin doon sa liwat ni Escudero na sa Sorsogon dae pwede an pwede na dahil kaipuhan maitao tolos na serbisyo sa tawo na matanos asin de kalidad sagkod sa katapusan.
An Sorsogon iyo an kaenot-enoteng provincia sa Bicol region na nagkamit kan siring na certificasyon.
Taon 2019 kan ponan kan kapitolyo an pagsungkit kan ISO sa tabang asin superbisyon kan Development Academy of the Philippines mantang an systems audit nag arangkaa kan nakalihis na Abril asin Mayo.
(Source: Bicol News)