General Santos City – Land Transportation Office (LTO) Region 12, nagpahimangnu sa publiko nga magbantay sa pipila ka mga indibidwal nga naga solicit aron mangayo ug tabang pinansiyal gamit ang nagkadiyang ahensiya sa gobyerno.
Kini ang nahimong pahinumdom ni LTO 12 Regional Director Macario Gonzaga human dunay pipila ka indibidwal nga naghatag ug solicitation letter sa LTO nga nangayo ug tabang pinansiyal gamit ang usa ka barangay ug duna pay pirma sa kapitan nga wala nasayod ang Brgy. Official.
Gikumpirma usab ni Gonzaga nga niadtong milabay nga tuig dunay insidente nga gigamit ang opisina sa LTO logo sa pipila ka indibidwal panahon sa pasko nga nagsolicit alang sa ilang aktibidadis.
Apan nasayran na lamang nga usa ka modus ang gihimo sa mga nasangpit aron nga makapangawarta.
Tungod niini nagpagawas ug advisory ang maong buhatan sa social media aron masayran sa publiko nga ang LTO wala gapangayo ug tabang pinansiyal bisan asa tungod duna silay igong pondo sa ilang mga aktibidadis.
Gihingusgan usab ni Gonzaga nga sukad sa iyang pagpungko isip labaw sa LTO 12 sugod niadtong 2012 wala niya gitugutan ang iyang mga sakop nga magsolicit para mangayo ug tabang pinansiyal.
Kalabutan niini gipahinumduman sa opisyal ang mga opisyal sa barangay, munisipyo, syudad, mga asosasyon ug transport group nga magbantay aron dili sila mabiktima sa mga mangingilad.
Kung dunay ingon niini nga impormasyon, gilayong ireport sa ilang opisina o sa pulis higayon nga dunay muduol kanila sama niining insidente aron mahatagan ug aksiyon ug ma-imbestigahan.
(Source: LTO-12)
