Patay ang usa ka ATM technician, human kini gipusil sa wala mailang suspek samtang mosakay na unta sa iyang motorsiklo sa may Lapu-Lapu St., Brgy. Dadiangas East ning syudad sa GenSan, alas 03:50 karong hapon lang (June 07, 2022).
Giila sa kapulisan ang biktima nga si Anthony Magbanua Asuncion, 39 anyos, minyo, lumad na taga Block 4, Lot 1, Villa Jacinto, Las Pinas City ug temporaryong nanimuyo sa may Block 23, Zone2C Extension, Brgy. Bula ning syudad.
Subay sa gihimong inisyal na imbistigasyon sa Police Station Number 1, nasayran nga gikan sa balay sa iyang kauban ang biktima ug nigawas aron magmaneho sa iyang motorsiklo gumikan aduna silay adtoan, kalit lang matud pa adunay motorsiklo ang nikalit ug hunong dayon gipusil ang biktima sa upat ka higayon sa wala masayring mamumuno.
Hinungdan nakaangkon si Asuncion ug daghan samad pinusilan sa iyang kalawasan,gisuwayan pa kini og dala sa may Diagan Hospital, apan gideklara kining patay sa doctor sa pipila ka minuto ang milabay.
Samtang human sa pagpamusil dali ra usab nga nakasibat ang wala masayring mmga suspek sa wala masayring deriksyon.
Nakuha sa crime scene ang 4 ka mga basiyo sa bala sa .45 caliber pistol na maoy gituhuan na gigamit sa wala masayring mamumuno.
Sa pagkakaron nagpadayun ang ginahimong imbistigasyon sa mga kapulisan kalabot sa maong krimen.
(Source: GSCPO)
